Dominiken vin koupe kat yo an Ayiti, yon reyalite nou pa dwe mete sou kote

Dominiken vin koupe kat yo an Ayiti, yon reyalite nou pa dwe mete sou kote

Nan Sendomeng, vodou a rete yon relijyon moun pa twò renmen pale sou li. Pou anpil dominiken, relijyon sa a se Ayisyen ki kwè ladan li paske yo pa kwè nan Bondye, kote yo ap fè anpil sakrifis pafwa lannwit. Malgre sa gen yon ti kras Dominiken ki pratike yon vodou ki se yon vodou Dominiken. Jodi a lakoz anpil Ayisyen ki al viv Sendomeng, anpil dominiken inisye yo a relijyon sila a. Ki rezon ki pouse yo entèrese ak li?

Dènye tan sa yo kominote Ayisyèn lan pa sispann grandi nan Repiblik Dominikèn. Anpil nan yo kite peyi a lakoz ensekirite, kèk lòt se pou al chèche yon lavi miyò. Si nou jwenn anpil ki nan koupe kann, anpil lèzòt tou nan konstriksyon e genyen ki gen gwo biznis tou.

Nan fòse kouri kite peyi a Ayisyen pote anpil bagay ki soti nan kilti li pote bay Dominiken yo. Nan peryòd kote Kowonaviris t ap ravaje peyi vwazen an, Dominiken te entèrese anpil ak te fèy Ayisyen yo. Gen yon lòt bagay anpil nan dominiken entèrese ak li jodi a, se vodou a.

Kisa ki fè Dominiken entèrese ak vodou a?

Jeneralman, Ayisyen ki grandi ak kwayans « Lwa » yo konn kisa vodou a itil yo. Anpil pratike li an katimini, gen lòt tou ki montre se sa yo ye. Yon Ayisyen p ap janm di ou li te ale kay ougan, yon manbo oubyen yon bòkò.

Menm jan anpil nan moun k ap viv an Ayiti oubyen lòt bò dlo konn ale pou al chèche remèd kay yon ougan oubyen yon solisyon a yon pwoblèm, gen lòt ki konn ale pran pwen pou gen lajan, pou pa pran bal, elatriye. Yo konn ale pran Beny chans (ben rityèl) yo nan plizyè kote nan peyi a ki repite pou sa, pou yo kapab jwenn pwomosyon nan travay yo, pou yo kapab marye oubyen fè pitit, elatriye, yon ansanm reyalite ki genyen nan pratik vodou an Ayiti.

Sa anpil moun pa konnen tou, pratik sa yo gen kòmanse genyen renome kay vwazen an tou paske anpil Ayisyen mennen dominiken, dènye tan sa yo, an Ayiti pou vin pran pwen. Yo mache kay gwo ougan ki genyen nan peyi a, lè yo tounen nan peyi yo pou afè yo kapab mache, selon sa yon konpatriyòt Ayisyen nou te rankontre rakonte nou.

Alèkile, ansanm pratik sa yo gen siyifikasyon pou anpil dominiken. Sa pa fè yo vodouyizan pou sa. Sa pa fè yo fòseman kwè nan  » lwa  » yo pou sa tou. Yo kapab swa biznisman ki kite peyi yo pou vin chèche mwayen pou devlope biznis yo, swa anplwaye k ap chèche pwomosyon.

Dominiken vizite sit touristik mistik yo an Ayiti

Mizapa de kay ougan oubyen manbo dominiken yo konn al koupe kat, anpil konn vini vizite kèk sit touristik mistik an Ayiti. Se Ayisyen yo ki konn rakonte yo kisa ki genyen nan sit sa yo. Yo konn ale kote yo di yo moun pran beny pou kapab gen chans tankou Sous Pyant, Sodo ak lòt ankò.

Anpil kote nan Gran Nò a repite zòn moun kapab vin benyen pou chans, pou retire giyon. Nou jwenn Basen Sen Jak tou prè Okap kote dominiken konn vini. Nou jwenn tou Sodo, nan depatman Sant la ki rale anpil touris pami yo anpil ki sòti kay vwazen.

Si anpil Ayisyen pa tolere pratik sa yo, gen anpil moun ki sòti nan lòt pati Zile a pou vin chèche yon solisyon gras ak enfliyans Ayisyen. Gen lòt fwa tou se yo menm ki vini pou kont yo.

Alix ISRAËL/ Haitimes
alixisrael53@gmail.com

Partager l'article article.

Laisser un commentaire

Votre adresse e-mail ne sera pas publiée. Les champs obligatoires sont indiqués avec *