Politik|-. Sektè Demokratik la blofe Me. Mécène

Politik|-. Sektè Demokratik la blofe Me. Mécène

Manifestasyon, boule kawoutchou, bloke lari se tout manèv Sektè Demokratik ak Popilè a te itilize pou te fòse Jovenel Moïse rache manyòk li bay tè a. Yo te vle ranplase li pa yon jij Lakou Kasasyon, men se Mécène Jean Louis ki te rive jwenn chans li. Nan dènye moman yo, apre lanmò Jovenel la, sektè a bliye si granmoun lan te egziste.

Apre gwoup politik ki rele sektè demokratik la ki gen pou pòt pawòl Mèt André Michel ak kèk lèzòt pati te fin debòde, se Mèt Mécène, jij ki pi ansyen nan Lakou Kasasyon an y ap mete kòm Prezidan Tranzisyon Koupe fache a, sanble kat la rebat. Mèt la ta sanble p ap souse yon mant.

Apre lanmò Prezidan Repiblik Dayiti a, Jovenel Moïse nan lannwit 6 pou rive 7 jiyè a lakay li nan Pèleren 5, sitiyasyon politik la mangonmen nan peyi a sitou ak pil pale pou ta ranplase ansyen nonm bannann lan sou pouvwa a. Ti rès Senatè ki sou bisantnè a chwazi mouche Joseph Lambert pou dirije peyi a, plizyè lòt pati politik chita epi chwazi menm mouche sa a pou pran tèt Leta a epi mouche Ariel Henry kòm Premye Minis. Sektè Demokratik la menm di twòp vitès, fòk kat la rebat pou tout moun dakò san konte Pitit Desalin ak Lavalas ki pot ko sonnen gòdèt.

Nan semèn sa a menm, pati politik, moun nan sosyete sivil la ak plizyè òganizasyon chita reflechi pou ta jwenn yon antant lajman laj sou kiyès ki pral gouvènen peyi a pou yon ti bout tan annatandan eleksyon yo ta rive fèt.

Nan tout sa ki te vini nan zòrèy nou nan redaksyon Mano Actualité avan seri diskisyon sa yo, se non Joseph Lambert ak Claude Joseph ki t ap klewonnen toupatou, nan tout radyo. Se Joseph sèlman k ap fè aktyalite dènye jou sa yo, antouka!

Mèt Mecène, jij ki te pi ansyen nan Lakou Kasasyon an li menm li pote Siyati Jean Louis, li sanble pa nan batay ditou, mouche a vide dlo pou granmèsi, li kriye pou anyen. N ap raple ke Louis Jean Beaugé ki te rele Jovenel Moïse la te revoke jij la paske dapre Prezidan defakto a mouche Jean Louis t ap konplote kont pouvwa li a sanble pou ta jete li pou pran plas la. Ki Mécène atò?

Jiska Prezan nou pa konnen ki kote Prezidan nimewo 2 a ye, nan ki palè Mèt André Michel mete li e kisa mèt la pral fè ak Jij la ki deja pèdi djòb li depi yon bon ti bout tan.

Selon tout sa n ap tande, Mécène sanble dòmi deyò, Mécène antrave! Mécène mele.

Partager l'article article.

Laisser un commentaire

Votre adresse e-mail ne sera pas publiée. Les champs obligatoires sont indiqués avec *